ಕೊರೊನಾಗಿಂತ ಹೆಚ್ಚಾಗಿರುವ ಬಿಜೆಪಿ ಭ್ರಷ್ಟಾಚಾರ: ಸಿದ್ದು

466

ಬೆಂಗಳೂರು: ಇಡೀ ರಾಜ್ಯದಲ್ಲಿ ಕೊರೊನಾ ತಾಂಡವ ಇದ್ದರೂ ಸರಕಾರ ಭ್ರಷ್ಟಾಚಾರದ ತಾಂಡವದಲ್ಲಿ ಮುಂದಾ ಗಿದೆ ಎಂದು ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಆರೋಪಿಸಿದ್ದಾರೆ.
ಬೆಂಗಳೂರಿನ ಕೆಪಿಸಿಸಿ ಕಚೇರಿ ಯಲ್ಲಿ ಪಕ್ಷದ ಅಧ್ಯಕ್ಷ ಡಿ.ಕೆ. ಶಿವಕುಮಾರ್ ಜತೆ ಜಂಟಿ ಸುದ್ದಿಗೋಷ್ಠಿ ನಡೆಸಿದ ಅವರು, ಜು.೩ ರಂದು ಮೆಡಿಕಲ್ ಉಪಕರಣ ಖರೀದಿ ಅವ್ಯವಹಾರದ ಪ್ರಸ್ತಾಪ ಮಾಡಿದ್ದೆ. ಆದರೆ ಸರಕಾರ ದಿಂದ ಅಧಿಕೃತವಾಗಿ ನನ್ನ ಆರೋಪ ತಳ್ಳಿ ಹಾಕೋ ಕೆಲಸ ಮಾಡಿಲ್ಲ. ಆದರೆ ೧೭ ದಿನಗಳ ನಂತರ ಡಿಸಿಎಂ ಹಾಗೂ ಆರೋಗ್ಯ ಸಚಿವರು ದೀರ್ಘ ಪತ್ರಿಕಾಗೋಷ್ಠಿ ನಡೆಸಿ ಆರೋಪ ನಿರಾಕರಣೆ ಮಾಡಿದ್ದಾರೆ ಎಂದರು.
ಸಿದ್ದರಾಮಯ್ಯ ಸುಳ್ಳು ಆರೋಪ ಮಾಡಿದ್ದಾರೆ ಎಂದಿದ್ದಾರೆ. ೩೨೪ ಕೋಟಿ ರೂ. ಅಷ್ಟೇ ಖರೀದಿ ಮಾಡಿದ್ದಾರೆ. ಆದರೆ ಸಿದ್ದರಾಮಯ್ಯ ೨೦೦೦ ಕೋಟಿ ಆರೋಪ ಮಾಡಿ ದ್ದಾರೆ. ಸಾಬೀತಾದರೆ ರಾಜೀನಾಮೆ ಕೊಡುತ್ತೇನೆ ಎಂದು ಶ್ರೀರಾಮುಲು ಹೇಳಿದರು. ಸಿಎಂ ಕೂಡಾ ವೈದ್ಯಕೀಯ ಸಾಮಗ್ರಿಗಳ ಖರೀದಿ ಯಲ್ಲಿ ಅವ್ಯವಹಾರ ನಡೆದಿಲ್ಲ. ಎಲ್ಲ ಮಾಹಿತಿಗಳನ್ನು ಕೊಡುತ್ತೇವೆ ಎಂದಿದ್ದಾರೆ. ಬಿಎಸ್ ವೈ ರಾಜ್ಯದ ಜನರಿಗೆ ಸುಳ್ಳು ಹೇಳಿದ್ದಾರೆ ಎಂದು ಸಿದ್ದರಾಮಯ್ಯ ದೂರಿದರು.
೯-೬-೨೦೨೦, ೩-೭-೨೦೨೦ ಹಾಗೂ ೧೦-೭-೨೦೨೦ ರಂದು ಒಟ್ಟು ೨೦ ಪತ್ರ ಬರೆದಿದ್ದೇನೆ. ಇದುವರೆಗೆ ಆರೋಗ್ಯ ಇಲಾಖೆಯ ಕಾರ್ಯದರ್ಶಿ ಬಿಟ್ಟರೆ ಬೇರೆ ಯಾವ ಪತ್ರಗಳಿಗೆ ಉತ್ತರ ಬಂದಿಲ್ಲ. ಸರಕಾರ ಪ್ರಾಮಾಣಿಕವಾಗಿ ಇದ್ದಿದ್ದರೆ ಇದುವರೆಗೆ ಬರೆದ ಪತ್ರಕ್ಕೆ ಉತ್ತರ ಕೊಡಬೇಕಾಗಿತ್ತು. ಸತ್ಯವನ್ನು ಅಡಗಿಸಲಾಗುತ್ತಿದೆ ಎಂಬುವುದು ಇದರಿಂದ ಸಾಬೀತಾಗಿದೆ. ಪ್ರಾಮಾಣಿಕತೆ, ವ್ಯವಹಾರದಲ್ಲಿ ಪಾರದರ್ಶಕತೆ ಇದ್ದಿದ್ದರೆ ಸತ್ಯವನ್ನು ಜನರ ಮುಂದೆ ಹೇಳಬೇಕಾಗಿತ್ತು ಎಂದು ಆಗ್ರಹಿಸಿದರು.
ಸರಕಾರ ಜನರಿಗೆ ಉತ್ತರದಾಯಿತ್ವ ಹೊಂದಿದೆ. ಇದು ಸರಕಾರದ ಕರ್ತವ್ಯ ಕೂಡಾ, ಸಾರ್ವಜನಿಕ ಹಣ ಖರ್ಚು ಮಾಡುವಾಗ ಪ್ರಾಮಾಣಿಕತೆ ಅಗತ್ಯ ಸತ್ಯವನ್ನು ಜನರ ಮುಂದೆ ಸರಕಾರ ಇಡಬೇಕು. ನಾವು ಪ್ರಶ್ನಿಸಿದರೆ ಸರಕಾರಕ್ಕೆ ಸಹಕಾರ ನೀಡುತ್ತಿಲ್ಲ ಎನ್ನುತ್ತಾರೆ. ಸರಕಾರಕ್ಕೆ ನಾಚಿಕೆ ಆಗಬೇಕು. ಸರಕಾರಕ್ಕೆ ಎಲ್ಲ ರೀತಿಯ ಬೆಂಬಲ ಸಹಕಾರ ನೀಡಿದ್ದೇವೆ. ಜನರ ಜೀವನ ಉಳಿಸಲು ತಮ್ಮ ಸಹಕಾರ ನಿರಂತರ ಇದೆ. ಆದರೆ ಕೋವಿಡ್ ಸಂದರ್ಭದಲ್ಲಿ ಲೂಟಿ ಹೊಡೆದರೆ ಅದಕ್ಕೆ ಸಹಕಾರ ನೀಡಬೇಕಾ ಎಂದು ಸಿದ್ದರಾಮಯ್ಯ ಕಿಡಿಕಾರಿದರು.
ಅಶ್ವಥ್‌ನಾರಾಯಣ ೩೨೪ ಕೋಟಿ ರೂ. ಖರ್ಚು ಎಂದು ಹೇಳಿದ್ದಾರೆ. ನನ್ನ ಮಾಹಿತಿ ಪ್ರಕಾರ ಆರೋಗ್ಯ ಇಲಾಖೆ ೭೦೦ ಕೋಟಿ ರೂ. ಖರ್ಚು ಮಾಡಿದೆ. ಬಿಬಿಎಂಪಿ ನಗರ ಸ್ಥಳೀಯ ಸಂಸ್ಥೆಯ ೨೦೦ ಕೋಟಿ ಖರ್ಚು ಮಾಡಿದೆ. ಕಾರ್ಮಿಕ ಇಲಾಖೆ ೧೦೦೦ ಕೋಟಿ ರೂ. ಖರ್ಚು ಮಾಡಿದೆ. ವೈದ್ಯಕೀಯ ಇಲಾಖೆ ೮೧೫ ಕೋಟಿ ರೂ. ಖರ್ಚು ಮಾಡಿದೆ. ಸಮಾಜ ಕಲ್ಯಾಣ, ಗೃಹ, ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಕ್ರಮವಾಗಿ ೫೦೦ ಕೋಟಿ, ೧೬೦ ಕೋಟಿ ರೂ ಖರ್ಚು ಮಾಡಿದೆ. ಕೋವಿಡ್ ಆರೈಕೆ ಕೇಂದ್ರಕ್ಕೆ ಒಟ್ಟು ಉಪಕರಣಗಳ ಖರೀದಿಗೆ ೪೧೬೭ ಕೋಟಿ ಖರ್ಚು ಮಾಡಲಾಗಿದೆ. ಮಾರುಕಟ್ಟೆ ದರಕ್ಕಿಂತ ದುಪ್ಪಟ್ಟು ದರಕ್ಕೆ ಖರೀದಿ ಮಾಡಲಾಗಿದೆ ಎಂದು ಆರೋಪಿಸಿದರು.